October FAVORITES ♡ !!

السلام عليكم

اليوم البوست راح يكون عن مفضلاتي للشهر الوردي اكتوبر ، في بعضها جديده عرفتها هالشهر وبعضها قديمه لكن للحين استخدمها بشكل مستمر حاولت قد ما اقدر ان البوست ينزل 31 اكتوبر لكن قاتل الله الكسل خلونا نتخيل انه نزل بـ31 اكتوبر D:

MAC Mineralize Volcanic Ash Exfoliator

اول شي في مفضلاتي هو شي عرفته من شهرين وشي تقريباً والى الان احببه مع ان هالمقشر ماكان من الاساس في بالي ولا قد قريت عنه بس اخذته لما كنت مسافره وعلى اساس انه الماسك اللي كثير بلوقرز مدحوه عاد يوم شريته اكتشفت انه مقشر ، سبب انه في مفضلاتي هو انو وقت السفر تسير بشرتي جافه بس هالمره بزياده جاها تصحر وصارت كلها قشور حول الانف وعلى الخد وعلى الجبهه بشكل بارز ومزعج فَ كنت مره متضايقه وعلى اني ماخذه الكلاريسونيك وماخذه كريمات ترطيب وماخذه مقشر بس برضو كل يوم بشرتي اسوء من اليوم اللي قبله عاد اخذت هذا على اساس انه الماسك يوم عرفت انه مقشر واستخدمته بشرتي كانت ناعمه بس لسه ماكنت شايفه النتيجه حطيت كريم مرطب ونمت والصباح جتني صدمه كل القشور اختفت بشرتي رجعت طبيعيه ، تقريباً بعدها بيوم رجعت لي شوية قشور حول الانف والجبهه بس ويين فرق كبيير عن قبل ما استخدم المقشر وبعد ما استخدمته !

وصف المنتج : رغوه معدنيه فريده ، مكوناتها سكر واللي يعمل على التقشير وازالة خلايا الجلد الميته بفعاليه والرماد البركاني اللي يمتص الدهون من البشره ، المقشر يُستخدم للوجه والجسم ومناسب لجميع انواع البشره .

لونه اسود وقوامه طيني سميك ويدبق شوي صعب في التوزيع بس مفعوله جبار يعني جد يقشر من قلب ويشيل كل الجلد الميت والقشور ويترك البشره ناعمه بشكل فضيع وبالنسبه لي ابداً مانشف بشرتي لكن احب استخدمه بالليل واستخدم بعده كريم مرطب عميق لأن احس بشرتي تمتص الكريمات المرطبه بشكل افضل بعده ، الشي الوحيد السيء فيه ريحته شينه وقويه ماعرف ليه منتجات البشره حقت ماك ريحتها شينه .

Vaseline Spray And Go Moisturizer

هالبخاخ الى الابد في مفضلاتي احبه وذي ثالث علبه تقريباً وخايفه اخلصها لأن اول كنت اخذه من تاجره وماصارت تجيبه وطلبته لنفسي من امازون ومارضو يشحنونه :") ماعلينا هو مو زود في الترطيب لأن ترطيبه خفيف بس لأن فكرته جميله استخدمه بالصباح اذا كنت مستعجله بسرعه ابخه والبس وانتهى الموضوع ، برضو لرجولي انا رجولي دائماً جافه فأحط العلبه جنبي واجلس ابخبخ D:  تمتصه البشره بسرعه وريحته لطططيفه ما اذكر اني اخذت مرطب من فازلين واعجبتني ريحته ! بإستنثاء هذا ريحته حلوه وخفيفه بس بحكم انه بخاخ فَ ترطيبه خفيف حلو للأستخدام خلال اليوم بالنسبه لي ما احطه وانام الا اذا كنت تعبانه او متعجيزه ارطب جسمي لأن قبل انام احب استخدم كريم ثقيل او زبدة جسم عشان تعطيني ترطيب عميق .

NARS Radiant Creamy Concealer 

دائماً لما القى شي ينمدح زياده عن اللزوم وحوله ضجه وكل الناس تتكلم عنه اتوقع شغلتين يا اني راح اجربه واكرهه مررره يا اني راح اجربه واحبه مررره هالكونسيلر من الاشياء اللي حبيتها ومن شريته وهو الكونسيلر الوحيد اللي استخدمه

وصف المنتج : خافي عيوب قوامه كريمي تغطيته متوسطه الى عاليه قابله للبناء ، يوحد البشره يخفي العيوب وبرضو خفيف ويندمج بسهوله ويبان طبيعي ، غني بالترطيب ويعطي نهايه مضيئه بفضل احتواءه على تقنيه عاكسه للضوء .

. غير كوميدوغينيك او Non-comedogenic : بمعنى انه ماراح يتسبب بإنسداد المسام اللي يعرض البشره للرؤوس السودا والحبوب .
. خالي من البارابين ، خالي من الكحول ، خالي من العطور الصناعيه .
. ثابت ومايخطط .

اتفق مع كل الكلام المكتوب جد الكونسيلر قوامه مره كريمي بسهوله يندمج وخفيف ويبان طبيعي مره تغطيته متوسطه وينور تحت العين وبرضو ثابت بس ما اتفق مع انه مايخطط لأنه يخطط ! لما اكون مرطبه عيني قبل ما استخدمه واثبته ببودره  تقريباً يبدأ يخطط بنهاية اليوم بس لما ما اسوي هالشغلتين يخطط قبل بس بكل الاحوال ما اشوف انه الكونسيلر اللي بسرعه يكتل تحت العين ويخطط " الا اذا كثرتي " لكن برضو مش الكونسيلر اللي ابداً ماراح يخطط ، بالنهايه جمييل ومغنيني عن اني استخدم اي كونسيلر ثاني هالفتره لكن بالايام اللي هالاتي تحتاج فيها تغطيه اكثر اخلطه مع شوي من كونسيلر ماك برو لونق وير .

اخذت منه درجتين لأن طلبته من النت وكنت متردده كثير بين درجتين فَ طلبت الدرجتين اللي كنت محتاره بينهم و الاثنين ناسبوني بس الفرق في الاندرتون ، الدرجات هم :

Honey : اساسه مشمشي دافي مناسب للبشرات الفاتحه الى المتوسطه ، حبيت اللون كمصحح للهالات يغطيهم بشكل ممتاز بس بالمقابل ماحبيته كخافي للعيوب حسيته بزياده جاي على وردي ف ماناسبني لهذا الاستخدام .

Custerd : اساسه اصفر مناسب للبشرات الفاتحه الى المتوسطه ، وهي الدرجه اللي حبيتها استخدمها تحت العين وعلى عيوب البشره تعطيني تغطيه ممتازه للأثنين .

سواتش :

العلبتين قربوا يخلصون ورجعت طلبت لي بس هالمره اخترت كاسترد بس لأن جربت هوني صحيح اعجبني كمصحح بس هالاتي عموماً ماتحتاج مصحح قبل الكونسيلر فَ كاسترد يكفي والكونسيلر متوفر بـ 10 درجات بدايةً من الافتح Chantilly الى الاغمق Cacoa .

MAC Whirl Lip Liner 

اييه بالضبط كايلي جينر :) مكياجها هالفتره فتتتتنه وهاللون صاير ترند من وراها واتوقع انها تستخدم هالدرجه من ماك لشفايفها اللون وردي على بني مره جميل البيجمنتيشن ممتاز والقوام كريمي بسهوله ينحط بس ينشف لمات فَ مررره ينشف الشفايف اللي تبي تحطه لوحده تقشر شفايفها وترطبها قبل ، برأيي اللون يناسب جميع البشرات بس يختلف من وحده لوحده حسب شفايفك ممكن يبان عليك وردي - موف اكثر او يبان بني اكثر ، احياناً استخدمه لوحده واحياناً مع روج بكل الاحوال جميل ، اللي ماتحصله او تبي بديل ارخص تجرب من نكس Mauve مطابق تماماً لحق ماك .

سواتش :

" Urban Decay Revolution Lipstick " Liar

الثاني من اربن ديكاي اسمه " Liar " ، سؤال ليه محد تكلم عن ارواج اربن ديكاي قبل كذا ؟ ليه توني ادري عنهم :") ؟
الارواج قوامها كريمي بمعنى الكلمه اللي ماتحب الارواج الكريميه تبعد عنه لأنه اكثر روج كريمي بتجربه بحياتها اللون جداً غني وواضح من اول مره ، بس الثبات لكم عليه بالنسبه لي ثابت 3 ساعات , اخذت هذي الدرجه اللي هي وردي دافي على بني مناسبه للأستخدام اليومي بالنسبه لي هالشهر هالروج كان النيود المثالي لكل يوم احطه مع محدد شفايف ماك ، عموماً اللي عاجبها مكياج التسعينات اللي كايلي طايحه فيه هالفتره تجربهم .

سواتش :

Lorac Pro Palette 2

اللي الى الان ماجربت باليت لوراك اعتبر انها ماجربت اي باليت ظل بحياتها البيجمنتيشن شي فوق الوصف مايحتاج حتى برايمر الظلال كريميه زببده تندمج بطريقه ممتازه ولأني اعشق اول باليت نزل من لوراك كنت متحمسه اجرب لوراك 2 ولو اني ماكنت متأكده من الالوان البارده لأن انا في الظل اميل للألوان الدافيه اكثر بس لما جربته غيرت رأيي الباليت نفس فكرة لوراك برو فيه 16 لون اول صف ثمانية الوان مطفيه وثاني صف ثمانية الوان فيها شيمر ، ونفس الباليت الاول العلبه نحيفه مره وخفيفه وفيها مرايه يعني تصميمها مثالي للسفر الاختلاف بألوان العلب لوراك برو العلبه سودا ولوراك برو 2 العلبه رماديه وبرضو نفس الباليت الاول يجي معه عينه من برايمر للعين والبرايمر عن تجربه ممتاز والعينه راح تقعد معك فتره طويله مره ، الالوان نفس جودة الباليت الاول من ناحية الثبات والبيجمنتيشن من اول مسحه بتشوفين كيف وضوح الالوان واشوف ان الالوان اللي فيها شيمر كريميه اكثر من الالوان المطفيه الفرق بين البالتين ان الاول الالوان اساسها دافي وهذا الباليت الالوان اساسها بارد بس في بعض الالوان الدافيه ، عموماً اشوف ان الباليت مره يستاهل التجربه بالذات لو عندك لوراك برو اللي ماعندها لوراك برو ومحتاره بين الاثنين اكيد ارشح لوراك برو اللي هو الباليت الاول لأن الالوان عمليه اكثر بس بالنهايه اشوف الاثنين حلوين ومختلفين عن بعض والاثنين بنفس الجوده ويستاهلون التجربه .

الالوان :

اول صف : 

Buff : اصفر مطفي ، تقدرين تستخدمينه كَ اضاءه تحت الحاجب لو ماتبين شي مبالغ فيه او فيه شيمر . 

Light Brown : من اسمه بني فاتح بالنسبه لي اللون المثالي لطية الجفن وممتاز لدمج الظلال .

Cool Gray : رمادي اساسه بنفسجي .

Nectar : وردي مشمشي . 

Plum : بنفسجي غامق من اجمل الالوان في الباليت .

Navy : ازرق غامق وهو اكثر لون شد انتباهي في الباليت اعشق الازرق الغامق بس نادراً ما القى ظل ازرق يعجبني هذا اللون جميييل اولاً لأنه مطفي وثانياً لأن اللون غني وكريمي مرره .

Charcoal : رمادي غامق اللون الوحيد اللي ماحبيته لأني ماحب الرمادي .

Black : واصفينه انه اسود بالنسبه لي ماشوفه اسود غامق اشوفه رمادي غامق مره وغير كذا اللون مكرر نفس اللون موجود في باليت لوراك برو الاول . 

ثاني صف :

Snow : ابيض فيه شيمر مش اللون اللي احبه او استخدمه عادةً لأن احب الوان الهايلايت تكون انعم واخف تكون جايه على شامبين اكثر بس اللي تحب الاضاءه القويه على مدمع العين او تحت الحاجب راح يعجبها .

Beige : هالنوع من الالوان هي اللي احبها للأضاءه بيج على شامبين اللون مررره جميل والبيجمنتيشن فضييع اللون قوامه كريمي زبدده يندمج بسهوله احب استخدمه على عظمة الحاجب وعلى مدمع العين .

Rose : روز قولد لون اشوفه اساسي عند اي بنت لون جداً سهل تقدرين تحطينه على جفنك وتحطين ماسكارا وبس تكونين خلصتي .

Mocha : بني فاتح فيه شيمر .

Chrom : فضي على بنفسجي فيه شيمر من اكثر الالوان اللي احبها .

Silver : فضي فيه شيمر .

Jade : زيتي غامق فيه شيمر برضو من الالوان اللي كنت مره متحمسه اجربها مع اني اكره الاخضر بس هالدرجه جميييله .

Cocoa : بني غامق فيه شيمر .

سواتش : 

Gimme Brow Brow-Volumizing Fiber Gel

هالشي النتيفه من بنفت ماتوقعت اني بحبه بهالشكل ! مهما اجرب ماسكارا حواجب ارجع لهذي اول شي الفرشه صغيره مره فَ استخدامها دقيق ، ثاني شي اقدر استخدمها بدون حتى ما ارسم حواجبي بالايام اللي مستعجله فيها تعطيني حجم وتعبي الحاجب بشكل طبيعي مع ان انا من الناس اللي ممكن اطلع بدون نتفة ميك اب يومياً بس ما اطلع بدون ما اسوي حواجبي واكون راضيه عنهم 100٪ لأن هم اساس الوجه صراحه عاد هالنتفونه مغنيتني عن هوس تضبيط الحواجب كل يوم متوفر منها نوعين الأولى ملونه تثبت الحواجب وتعطيها حجم وفي منها درجتين الدرجه الفاتحه : light / medium ، والدرجه الغامقه : medium / dark وهي الدرجه اللي عندي اما النوع الثاني منها فهي ماسكارا شفافه تثبت الحواجب بس .

Sigma 3D HD kabuki Brush

الفرشه الجديده من سيجما كنت مره ابيها ومعزمه خلاص بطلبها ولقيتها بالصدفه في متجر ميك اب بالانستقرام ولما لقيته بالشرقيه وتسليم فوري قلت بس خلاص مكتوب علي اخذها كنت ابي الورديه بس للأسف هي والبيضا مخلصين من المتجر فأخذت الاسود ، الزبده الصدق ماصارلها غير 3 ايام معي اخذتها الاربعاء واستخدمتها مرتين بس يعني فرشه مابحتاج اكثر من يومين عشان اقرر اذا حبيتها او لا فَ عاد قلت احطها بمفضلاتي لأن ابي اتكلم عنها D: ولأنها الحب الجديد نفس مجموعة الكابوكي المشهوره من سيجما نفس المميزات بس تصميمها غريب الفكره انها مشطوفه من الجهتين فَ توزع لك الاساس والكونسيلر بطريقه مثاليه على كامل الوجه جهه تدمجين فيها الفاونديشن وجهه تدمجين فيها الكونسيلر ، استخدمتها للفاونديشن اوكي حبيتها مو شينه لكن مافيها اي فرق عن البقيه غير انو اقدر اوزع الفاونديشن يا بالتنقيط يا بأني ادمجه بخطوط بالطول كأني الون ما اعرف كيف اشرح بس اتمنى فهمتو قصدي عموماً انا ماحب هالطريقه لأنها تحتاج دمج كويس ولا يبان الفاونديشن مخطط فَ افضل استخدم فرش ادمج فيها بحركه دائريه لأنها تعطيني نهايه نظيفه ومتساويه ، بس للكونسيلر والكونتور والهايلايت كلام ثاني ج بّ ا ر ه اول شي تدمج الكونسيلر بسررررعه يعني اوزعه امرر الفرشه بالطبطبه ومن اول مره يندمج وبطريقه مثاليه نفس الكلام بالنسبه للهايلات الكريمي سواءً تحت العين او على الجبهه او الذقن تدمجه بشكل ممتاز وحتى على عظمة الانف وتحت الحاجب استخدم الراس اللي هو يجي حاد وادمج فيه وللكونتور نفس الشي استخدم الراس يعطيني كونتور محدد مو بس على عظمة الخد حتى على جوانب الجبهه ، زبدة الكلام تدمج بشكل فضيع وتعطي نهايه نظيفه ومصقوله ، وايه اتوقع انكم كذا اخذتوا فكره عني اني انسانه تحب تحلل فرشها
وتستخدمها بكل الطرق الممكنه ههههه .

هنا صوره اوضح لها طبعاً هي نزل منها كبيره للوجه وصغيره لمنطقة العين بالضبط نفس باقي فرش هالمجموعه ناويه اطلب الصغيره ان شاء الله *.* !

Helena Rubinstein Lash Queen Sexy Blacks Mascara

اخر شي في الميك اب ماسكارا من هيلينا روبنشتاين .. اوكي الباكجينج فآتن ! بس مو هذا المهم الماسكارا هذي طحت في غرامها اول ماسكارا وصراحه كانت اخر ماسكارا جربتها من هيلينا هي الغنيه عن التعريف ماذكر وش اسمها هههه بس التايجر المهم كانت من اكثر الماسكارات اللي احبها برأيي ماسكاراتهم جد مميزه وجميله ومو ماخذه حقها ما اشوف ناس كثير تتكلم عنها يمكن لأن الماركه مش موجوده بكل مكان ! كانت عندنا اول وللأسف قطعوها ، عموماً نرجع لموضوعنا اللي حبيته فيها الماسكارا نفسها مو سايله مره ولا ناشفه مره ولو اني اشوفها اقرب للسايله ، تعطي كثافه وطول وسوادها فضيع ، عيبها الوحيد انها تكتل شوي مو دائماً تعطيني رموش مفصوله غير عن كذا جمييله .

Essie Merino Cool , Dior Incognito  

للمناكير اول مره ما احط الالوان الغامقه هالفتره احس اني حابه احط نيود اكثر من اي لون ثاني مع ان الالوان الغامقه عشقي بالذات بالخريف اللون الاول من ايسي اللي هو بنفسجي على رمادي لون بارد وجميل للخريف واللون الثاني من ديور لون جمييل نيود على وردي اللون اللي يعطي اليدين انوثه ونعومه ونظافه .

سواتش للدرجتين :

Citrus Zinger Water Bottle

لو تعرفون ديتكوس المويه صاير روتين اساسي بيومي وطريقته بإنك تحطين اي فواكه او خضار تحبينها مع مويتك لو انتي مثلي تحبين الليمون تقدرين برضو تحطين نعناع \ توت \ فراوله \ شرايح خيار \ جريب فروت وحتى بطيخ راح اتكلم بتفصيل كبير عن ديتكوس المويه او Water Detox في بوست راح ينزل قريب اذا الله راد وراح يكون شامل ، المهم هالعلبه الجميله اخذتها من امازون ب11 دولار حبيت فكرتها مره لأنو تحت زي العصاره احط فيها ليمون وفوق احط اي شي ابيه مع مويه وغالباً يكون نعناع وشرايح ليمون وخيار .

Cheflr App

اخر شي في مفضلاتي هو تطبيق  ادمنته من اول ماعرفته ولأنه ساعدني كثير قلت لازم اتكلم عنه بمفضلاتي
انا انسانه تعششق الطبخ بس ماعندي ابتكار فيه او ابداع يعني اللي احب اسويه اشوف وصفات واطبقها بس اتكيسل انو ادور بنفسي وساعات ما القى الشي اللي ابيه فَ ميزة هالتطبيق انو تلقين فيه وصفات كثير وكل شيف عندها حساب خاص فيها تنزل وصفاتها وانتي تتابعين اللي تبين ، تلقون كل شي من مقبلات لأطباق رئيسيه لحلويات لمشروبات وحتى لوصفات صحيه يعني شامل لكل شي وش سالفة التطبيق ؟ تحملينه من الاب ستور وتسجلين بشكل عادي جداً اسمك ، ايميلك ، باسوورد وبس بتصير عندك صفحتك الشخصيه تسوين فولو لأي شيف تعجبك وصفاتها ولو انتي تنزلين وصفات بيصير عندك متابعين وتقدرين تحطين اي وصفه تعجبك بالمفضله وبكذا تكونين حفظيتها في حسابك وبرضو تقدين تحطين لايك او اعادة وصف ، التطبيق مره جميل انصح اي وحده تحمله .

وبس اتمنى ان البوست يكون مفيد :* .