My Europe Trip : Austria , Germany , Hungary

السلام عليكم
اهلاً بالمتابعين الجدد انبسطت كثير لما لقيت العدد زاد رجعتولي الحماس , هالاجازه انشغلت كثير وماكان عندي وقت فيها لأي شي يعني تقريباً اخذت اجازه الكترونيه والحمدالله كانت احلى اجازه كانت مليانه مناسبات , وعندنا في العائله كان صيف التخرجات ماشاءالله كان عندنا حفلات تخرج من جميع الاعمار D: والحين بما اني تفرغت بإذن الله الايام الجايه راح يكون فيه مواضيع كثير متنوعه بتكلم عنها , المهم بما انو كان عندنا شهر كامل بعد رمضان مافيه دراسه قررنا نسافر فَ اليوم البوست راح يكون تقرير عن زيارتي لثلاث دول اوروبيه " النمسا والمانيا وهنغاريا " و اتمنى يكون التقرير ممتع .

اقلاعنا كان فجر الثلاثاء من الدمام على الخطوط الاماراتيه ومسار الرحله كان : الدمام - دبي - فيينا ، والعوده فيينا - دبي - الدمام , مشينا الفجر لمطار الملك فهد ووصلنا الساعه 6 الصباح لمطار دبي والساعه 9 كانت رحلتنا الى فيينا وصلنا فيينا العصر ويُفضل ان فيينا تكون نقطة الانطلاق الى النمسا كون فيها مطار دولي وكونها مدينه تستحق الزياره ولو ان الكثير يفضلون الريف النمساوي ولا الوم احد الطبيعه في النمسا ساحره فعلاً جنة الله في ارضه , اول ماوصلنا كنا تعبانين من الرحله اللي استغرقت 13 ساعه تقريباً وماكان عندنا اصلاً وقت نسوي شي فسوينا زياره سريعه لحديقة شتاد بارك \ Stadtpark بما انها كانت مقابل الانتركونتننتال حيث نزلنا وحتى شارع الكارتنر او " شارع المشاه " جداً قريب من الفندق رحناه مشي ، الفندق موقعه ممتاز يعتبر في قلب فيينا بمعنى انه قريب من جميع معالم المدينه ومقابل الفندق محطة مترو " الاندرقراوند " وانا انصح بإستخدامه وتجنب التاكسي قدر الامكان لأنه غالي وممكن تستأجرون سياره بالنسبه لي الحل الاريح عشان ماتكونون مقيدين بوقت مابدخل في تفاصيل المواصلات لأنها بتاخذ بوست كامل بس مجرد بحث في قوقل وتلقون مواضيع كثير تتكلم عن المواصلات او وسائل النقل في اوروبا بالتفصيل الممل .
بالنسبه للطقس احنا سفرتنا كانت بنص اوغست ورجعنا اخر الشهر الطقس كان متقلب شوي شمس ودفا شوي برد ومطر بس اغلب الايام كانت ماطره والجو كان باررد بالذات في ميونخ الاجواء كانت ابرد من فيينا ، بالنسبه لي افضل شهر اوغست من بين كل شهور الصيف لأن الجو لا يكون حار حر مايُحتمل ولا يكون بارد اللي يخليك ماتستمتعين ! يكون بين البين وتمر ايام حاره شوي وايام بارده ، عموماَ الجو في اوروبا متقلب الافضل الواحد يشيك قبل السفره على الاجواء في الشهر اللي بيسافر فيه .

اول يوم : وصلنا العصر وعلى ما ارتحنا شوي ماكان في وقت غير اننا نزور اماكن قريبه من الفندق رحنا حديقة شتاد بارك وهي حديقه رايقه وهاديه ومليانه تماثيل اهمها واشهرها النصب البرونزي المذهب ليوهان شتراوس الثاني مؤلف مقطوعة الفالس " الدانوب الازرق ".

ما امداني اصوره الا قروب اسيويين تجمعوا عليه فجعوني تقل اول مره يشوفون تمثال :\ ! فالصوره مهتزه بعدها زرنا ساحة ستيفنز من اشهر ساحات اوروبا التسميه ترجع الى كاتدرائية سانت ستيفنز واللي تعتبر معلم شهير في فيينا واللي ماصورته هههه  الساحه كبيره وتعج بالسياح والمحلات والمقاهي والاستعراضات طبعاً فيينا مشهوره بالقصور والمتاحف بس انا مب من محبين هالاشياء بس اللي تحبها او تمشي على مبدأ رحتو لديرتهم ولا شفتوها تزورها, بعدين رحنا تعشينا وفي طريق رجعتنا للفندق وعلى اني كنت تعبانه بس الجو كان يقولي لااا تناااامييين ومعدتي اللي كانت مليانه اكل بعد تقولي يرحم امك لا تنامين امشي شوي , الدنيا كانت برد ومطر وانا نقطة ضعفي المطر مدري هل هي عقدة نقص ولا وشو لكن ما اقاوم المطر ابداً اعشق ريحة الدنيا بعد ماينزل مطر لو يسون منها عطر كنت شريته .. ادري اني بالغت في وصف حبي .. يعني اول يوم كان مشي بس واستمتاع بالجو العليل " طبعاً عليل بالنسبه للخليجين ولا الاوروبيين من اول نقطة مطر تلقونهم يركضون كل واحد يهج لمكان يحميه من المطر "

ليالي الانس في فيينا .. نسيمها من هوى الجنه  ❤

ثاني يوم : صحينا من بدري بدري للأستعداد والاستمتاع باليوم كامل قدر الامكان وانصح اي وحده مخططه للسفر قريب انها تستغل قومة الصباح لأن النهار عندهم مره طويل للساعه 8 الليل الدنيا يكون فيها نور بس مع كذا كل المناطق السياحيه تقفل بعد الساعه 4 والساعه 6 الاسواق تكون قفلت ماعدا المقاهي والمطاعم في شارع المشاه تبقى لساعات متأخره فالأفضل تستغلوا النهار من بدايته عشان يكون عندكم فرصه تزورون اكثر من مكان , في ثاني يوم كانت بداية انطلاقتنا لبحيرة المغاره " سي قروتي \ Seegrotte " تقع في هنتر برول وتبعد عن فيينا 17 كيلو تعتبر من اكبر بحيرات اوروبا تحت الارض و كانت في الاصل منجم يشتهر بأجود انواع الجبس فاض من المنجم حوالي 20 مليون لتر ماء عذب غطى الجزء الأسفل من المغارة مما أدى إلى إغلاق المنجم واعيدت المغاره بشكلها الحالي عام 1945 ، في الحرب العالميه الثانيه استخدمها هتلر كمخزن للأسلحه وامر بتصنيع احد الطائرات العسكريه المقاتله داخلها عشان كذا تعرف بإسم " مغارة هتلر " .

هنا اول مادخلت .. درجة الحراره في المغاره ثابته في الصيف والشتا وهي 9 درجات مئويه وبتلقونهم يأجرون بطانيات عند البوابه بـ1 يورو .

هذا يقولون واحد من اللي حفروا الكهف ولما فاضت البحيره في الكهف تجمد وانا اكذب وشكراً , الصدق مدري وش يطلع ذا بس كل اللي بالكهف تصوروا سيلفي معاه قلت اصوره .

المرشد اللي كنا ماشين معاه يتكلم الماني ولا انا ولا اختي فاهمين شي فكانت اختي تسألني وانا طبعاً كنت اعطيها معلومات من جيبي والظاهر اني تماديت شوي فقررت انها تسفهني وتلحق الالماني اللي مو فاهمه منه كلمه المهم من هالصوره نستنج ان كان فيه كنيسه جوى المغاره من سواها ومتى الله اعلم :) .

وهنا وصلنا للقارب اللي ياخذنا في جوله على البحيره عاد كان زحمه يومها وابوي يعطيني نظرات اللي ماودك بس نهون ونطلع ؟ وهذا اللي صار سحبنا عليهم وطلعنا بعدها وقفنا في مطعم اسمه بانوراما سبب التسميه ان الاطلاله على فيينا ، طلبنا اشياء خفيفه ايس كريم ومشروبات فقط يعني مجرد استراحه قصيره قبل نكمل رحلتنا .

هذا الشي يبكي من كثر ماهو لذيذ :") .. بعد كذا في طريق رجعتنا مرينا على حقول العنب والمنظر كان فآتن .

بعدها رحنا لحديقة الزهور في بادن " من ضواحي فيينا " .

وفي اخر اليوم زرنا حديقة لوكسمبورغ اللي تبعد عن فيينا ربع ساعه " وللأسف لأن اليوم كان طويل الكاميرا طفت :( ماكنت شاحنتها كفايه " هي حديقه تتوسطها بحيره الحديقه كبيره وجميله تستحق الزياره واستغرب ان محد يجيب طاريها ابداً !! البحيره فيها قوارب للتأجير في قوارب هوائيه وفي قوارب بالمجداف وفي قوارب كهربائيه ، وهنا بعض الصور اللي صورتها وانا اخذ جوله في البحيره بالقارب .

وختمنا اليوم بالعشا وكان غدا عشا في الواقع تعشينا في مطعم لبناني اسمه البدوي لذييذ مره وبقى المطعم في بالنا عشان نتعشى فيه مره ثانيه في ليلة الوداعيه لفيينا :")

ثالث يوم واخر يوم لنا في فيينا قررنا نطلع في رحله على نهر الدانوب وهاليوم كان الجو حااار ، نهر الدانوب من اشهر انهار المانيا وهو ثاني اطول نهر في اوروبا , يمر بعدة دول في اوروبا اضافه إلى المانيا مثل سلوفاكيا ، النمسا ،  المجر ،  صربيا ،  بلغاريا ورومانيا ، وفي النمسا يعبر مدينتين الاولى فيينا العاصمه والثانيه مدينة لينتز او بالالمانيه " لينز " .

تصبيره لين تجي الباخره D:

اول ماركبنا اخترنا نقعد فوق عشان نستمتع بالمنظر اولاً وعشان نتبرد ثانياً هههه

وهنا شوية صور بعد مانزلنا

وبعدما انتهت الرحله رجعنا للفندق الجو وقتها كان بارد ونزل مطر خفيف وعلى ان المحلات في شارع المشاه يومها كانت مقفله مع انو كان جمعه بس وقتها كان عندهم اجازه ماذكر وش مناسبتها لكن قلنا بما انو لسه عندنا وقت فَ نروح نتمشى

اليوم اللي بعده مشينا الى سالزبورغ وهي رابع اكبر مدينه نمساويه وهي مسقط رأس الموسيقار الشهير موزارت وبتلقون هناك قصر وحديقة موزارت وهي احد الاماكن السياحيه الشهيره بالاضافه لتميزها بالمناظر الطبيعيه الخلابه بسبب وجودها بقرب سلسلة جبال الالب تتميز ايضاً بسلسله من البحيرات العذبه وتسمى بالمثلث الذهبي وولف قانق سي - سانت جيلجين - موندسي او " بحيرة القمر " ، المسافه من فيينا الى سالزبورغ  295 كم و تقريباً اخذنا 3 ساعات ، معلومه قد لا تهمك الانمي المفضل عندي يوم كنت صغيره هو لحن الحياه وكان حلم حياتي ازور المكان اللي كانت فيه عائلة السيد ربيع عاد يوم كبرت عرفت انها النمسا وتحديداً سالزبورغ والحمدالله حققت هالحلم :) .
عموماً وكعادتنا وصلنا متأخر وماكان في وقت نسوي شي فَ رحنا تعشينا وهالمره الوجهه كانت مطعم هندي ، اخترنا تاج محل المطعم هذا عليه احتلال خليجي ودائماً زحمه وماياخذون اوردر بعد الساعه 9 عشان يلحقون على الطلبات الموجوده طيب السؤال يستاهل ؟ اي ونص انا مستعده اعيش عمري كله عالماسالا اللي يسونها :")3> !

ثاني يوم كان مخصص لمنطقة البحيرات يبلغ عدد البحيرات فيها 17 بحيره تقريباً لكن 7 بحيرات هم الاكثر شهره واللي هم فوشل ام سي - موندسي - سانت جيلجين - وولف قانق - هالشتات - اتيرسي - ترانسي ، واختيارنا كان وولف قانق واللي تبعد عن سالزبورغ 50 كم ، اللي يبي يزور البحيرات لازم يخصص لها يوم كامل بس بتكون فكره ممتازه لأن النهار طويل والوقت راح يساعده وفي رحلات مخصصه لزيارة البحيرات .

وولف قانق فيها قطار بخاري يُسمى schafbergbahn ياخذكم الى اعلى قمه في وولف قانق ومنها تشوفون بحيرة وولف قانق وموندسي وفوشل ام سي المنظر جداً ساااحر وفوق في مقاهي ومطاعم للي حاب يجلس ويستمتع بالمناظر ووقت الرجعه انتم تحددونه اذا تبون نص ساعه ، ساعه او اكثر شي راجع لكم لأن القطار كل نص ساعه يكون في نزول .

هذي الصور اخذتها وانا في القطار قبل نوصل ، كان في واحد قاعد جنبي وكل ماقام يبي يصور قمت انا صورت يروح هو يجلس ويستناني اخلص وسبحان الله اول مايجي منظر يشدني وابي اقوم اصور يقوم معي بنفس الوقت طبعاً هو يتراجع ويقعد وانا ابد ماعندي احساس هههه الين حسيت انه عيب لازم اعطيه فرصته واخليه يصور ولسوء حظه جا قراري بعد ماوصلنا :) .

هنا شوية صور اخذتها من القمه في قمتين القمه اللي يطلعكم لها القطار والقمه الثانيه بعد ماتنزلون من القطار تطلعون لها مشي وهنا بعد ماطلعت صورت المنظر من فوق وماراح اعلق على رأيي كاظم الصمتُ في حرم الجمال جمالٌ !

يسعدلي جوك الفخم :) .

هذي بحيرة موندسي وسبب تسميتها موندسي هو ان شكلها من الاعلى يشبه القمر موند Mond بالالمانيه تعني قمر و See بحيره " بحيرة القمر " .

بعدين نزلنا للقريه تمشينا فيها شوي واكيييد الشي اللي مالنا غنى عنه في كل منطقه نزورها هو الايسكريم 3> !

اليوم الثالث في سالزبورغ كان يوم جداً ممتع قررنا نزور الكهف الجليدي إيزرايسنفلت في قرية ويرفن Eisriesenwelt - werven ، ويُبعد عن سالزبورغ 60 كيلو اي قرابة الساعه او الساعه الا ربع طبعاً اول ماتوصلون بتلقون مكتب التذاكر ماعليكم الا اخذ تذكره والانتظار وفي فنفس المكان محل لبيع الهدايا والتذكار .

ماقاومتهم *.*

وفي نفس المكان برضو بتلقون لوحه توضح لكم مسار الطريق للكهف الجليدي وهو يعتبر اكبر كهف جليدي في العالم ، الجدير بالذكر ان الرحله متعبه مره لأنكم بتقعدون تمشون 20 دقيقه او اكثر يعتمد على لياقتكم من ثم توصلون للتلفريك واللي راح ياخذكم لنقطه ثانيه وبرضو تكملون مشي مسافه طويله لين توصلون للقمه حيث الكهف ، المسافه جداً طويله ومتعبه مع العلم انكم مش مقيدين بقروب سياحي فَ تقدرون توقفون للأستراحه مع التنبيه ان الرحله ماتناسب كبار السن او المصابين بأمراض مثل القلب و الضغط ومن رأيي الشخصي جداً غير مناسبه للأطفال ايضاً بالذات جوى الكهف المكان ضيق وظلام والدرج مبلل وبرضو المسافه مش هينه راح تكملون مشي في درج طويل جوى الكهف وينصح بارتداء ملابس دافئه وأحذيه ملائمة للمشي تمنعكِ من الانزلاق لأنّ درجة الحرارة غالباً ما تكون تحت درجة التجمّد حتّى خلال الصيف .

وبدأنا الرحله وامي وابوي قرروا يرافقونا لربع الرحله او اقل من الربع حتى P:

 بعدين تركونا عند هالكهف الصغيرون ورجعوا هما وكملت انا واخواتي واخوي المشي ولسه ورانا طريق طويل وشاق بس منظر قرية ويرفن من تحت الجبل كان يهون علينا التعب

واخيراً بعد مشي طووويل ومسافه حسينا انها ماراح تنتهي وصلنا للكهف الجليدي وهنا احنا ننتظر عند البوابه

قبل لا ندخل فيه مرشدين الاول يتكلم الماني والثاني انجليزي واحنا تبع الانجليزي D: المرشد يوزع مجموعة مصابيح جوتها نار مدري شمعه الزبده اللي هو هالشي ينقال له بينور لكم ومايعطيه للكل يعني لازم تلزقون مع واحد عنده مصباح لو حصل وما اعطاكم المرشد ، التصوير جوى الكهف ممنوع لذلك زرفت كم صوره من قوقل عشان اوضح لكم شكل الكهف من جوى ومن الاساس انا تركت الكاميرا عند اختي اللي رفضت تكمل معنا لأنها تكره الاماكن الضيقه والمظلمه ففضلت انها تستنى برى الكهف ، المهم اول مافتح البوابه ودخلنا رجعنا هوى جداً بااارد للحظه ماقدرت اتنفس وبعدها دخلنا جوى الكهف وبدأت رحلة الظلام والبرد كان بودي اسحب على القروب اللي ماشين معه وارجع عند البوابه ادخل واطلع لين يخلصون هههه

هذا هو الدرج والمسافه طويله مره لكن في طريق رجعه لو حسيتم بالتعب وقررتم ترجعون ، في الصوره مبين ان المكان منور لكن في الواقع المكان ظلااام وماتشوفون شي حتى مع الشموع اللي معطينا اياها وزحمه في الدرج بيكون معكم ناس كثير والدرج زي ماشايفين ضيق والاسوء من كذا الفتحات كبيره وظلام والدرج مبلل عشان كذا اقولكم الافضل ماتاخذون اطفال .

الكهف كذا من جوى ولا تصدقون انكم بتشوفون ذي الاشياء لأن ماحولكم الا الظلام D: الصدق مدري هي الناس شافت هالمناظر وانا الخوف معمي على قلبي ؟ ولا صدق كان ظلام وماينشاف شي !
وانتهت الرحله والطريق الطويل اللي جينا منه رجعنا منه :') كثير يشوفون زيارة الكهف ماتسوى وانه تعب على الفاضي وبالنهايه يدخلون كهف مظلم بس بالنسبه لي استمتع بمثل هالرحلات بالنهايه تجربه جديده لو مايجي منها الا يوم ادخل البوابه ويرجعني الهوى البارد D: كان اكثر جزء ممتع .

وش احسن من الاكل بعد نهاية يوم متعب ؟ ولا شي D:  النص الثاني من اليوم رحنا لسوق المشاه Getreidegasse وكل شي كان مقفل طبعاً مالحقنا على شي P: فقررنا بما انو كذا كذا وصلنا نجلس نتمشى والجو وقتها كان جميل وفي مطر خفيف فالمشي في هالاجواء بحد ذاته متعه

وهذا بيت موزارت

اخر يوم لنا في سالزبورغ رحنا حديقة الميرابيل افتتحت هذه الحديقه من قبل الإمبراطور فرانز جوزيف في عام 1854 وتعرف بإسم التحفة البستانيه فهي مزينه بمجموعات أزهار منسقه بطريقه فنيه ساحره

فهمت كل الناس الا ذا عجزت افهمه :)

وبعدها غادرنا المحبوبه النمسا متجهين للأراضي الالمانيه تحديداً لميونخ والمسافه بين سالزبورغ وميونخ 145 كم فقط يعني بحدود الساعه ونص ساعتين اول ماتركبون السياره مابتحسون نفسكم الا انتم متعدين الحدود النمساويه وداخلين المانيا ، ماصورت كثير بميونخ لأن الثلاث ايام قضيناها شوبيينج فماكان في شي يتصور بالنسبه لي اشوفها عباره عن مول كبير ههه لو احد يسألني وش الاماكن السياحيه فيها بقوله هاه ؟ بس لو يسأل عن المحلات هناك مستعده امتر معاه ميونخ جد هي جوها محلات ومقاهي ومطاعم وبصراحه المدينه مزعجه بس شي حلو نطلع من جو الهدوء والروقان في النمسا لجو المدينه والحركه في ميونخ , عموماً اللي تزورها بتحس بالانتماء مابتحس انها فَ بلد غريب لأنها مليييااااانه عرب ووين ماتروحون تلقون محلات ومطاعم عربيه .

اقرب شي لنا واول شي ندله هي المارين بلاتز \ Marienplatz هالساحه تعتبر قلب ميونخ وفي بعد كارلز بلاتز Karlsplatz او " شتاخوس " الساحه المشهوره بالنافوره وفي شارع يربط بين الساحتين اللي هو الشارع المخصص للمشاه والشارع له اسمين في البدايه من جهة ساحة كارلز يُسمي نيوهاوزر Neuhauser Str وفي النهايه من جهة ساحة مارين يُسمى كاوف فنقر kauffinger Str وبتلقون في الشارع محلات ومجمعات وفيه مجمع اوبر بولينقر OberPollinger المشهور تلقون فيه ماركات عالميه مثل لويس فيتون وديور وبرادا وجوتشي وكم ماركه بعد وهو اقرب لساحة كارلز ، برضو من المجمعات الشهيره كارشتات Karstadt , واللي تبحث عن الماركات العالميه عندها الماكسميليان شتراسه Maximilian str اللي هو من افخم وارقى شوارع المانيا بتلقى كل الماركات العالميه هناك كارتير ، شوبارد ، لويس فيتون ، ديور ، شانيل .. الشارع يبدأ من ساحة ماكس جوزيف Max-Joseph-Platz ، اما بالنسبه لمحبات الميك اب مثلي وشرواي فَ عندكم دوقلاس اللي هو سيفورا حقهم ههه وكارشتات بتلقون فيه ماك وديور وغيرلان وشانيل وهالطقه وبتلقون هيلينا روبنشتاين اللي للأسف مقطوعه عندنا ، برضو بتلقون لوريال وميبيلين وماكس فاكتور ، من ناحية الشوبيينج المانيا افضل بكثير من النمسا ولو ان الاثنين ماعندهم سالفه يعني مشي حالك مو الشي المبهر او اللي يجيبلك تخمة تسوق " ايه انا عندي مصطلح تخمة تسوق هههه " .

هنا في ساحة كارلز كانوا مسوين تحدي فجأه يلفون على اي واحد من الموجودين ويقولون له يس يس يس يس عشان يدخل جوى النافوره عاد اختي كانت مره قريبه منهم عشان تصور فيديو قاموا لفو عليها وقالو يس يس وامي من بعيد تعطيها خزة الامهات اللي ياويييلك ياسوااد ليلك لو دخلتي :)

اليوم الرابع في المانيا توجهنا للفاتنه الالمانيه قارمش 3> ! الريف الالماني مجحوووود مع انه في مناطق لا تقل جمال عن الريف السويسري او الريف النمساوي بهالسفره ما اسعفنا الوقت نزور مناطق ريفيه كثير لكن الطريق من النمسا الى المانيا لوحده سحررر منظر بديع يخليك لا شعورياً تسبحين خالق هالجمال .. بإذن الله الجايات نزور فيها المناطق الثانيه اللي كنت حاطتها ضمن المخطط ولا ساعدنا الوقت نروح لها , المسافه من ميونخ الى قارمش 90 كم تقريباً يعني بتاخذون بالطريق ساعه .. انا وامي واخواتي صحينا من 9 عشان نستعد ونفطر ونمشي وابوي واخوي قعدوا في ميونخ لحاجه في نفس يعقوب :) المهم وصلنا هناك على 11 المكان كان باررد مرره ولأننا طالعين لقمه ثلجيه فَمضبطين وضعنا طبعاً احنا من اول ماوصلنا للقريه واحنا لابسين الجاكيتات والالمان مايلبسون الجاكيتات الا لا طلعوا القمه .. مااش جلودنا مو متعوده على البرد :)

الوجهه الاساسيه والغرض الاساسي من زيارتنا لقارمش هو جبل تسوغ شبيتسه - Zugspitze " قمة المانيا الشامخه " ، اخذنا التكت واستنينا القطار وبعد ماركبنا القطار استغرق ربع ساعه حتى وصلنا للقمه و ا خ ي ر اً محبوب الخليجين " الــثــلـج " .

ممكن تطلعون له بالتلفريك بس للأسف امي ضد التلفريك ولا تحبه هي قطار وبالموت ركبت عاد قعدت تلمح لنا طول الطريق انه اذا ودكم تركبون تلفريك عادي بس انا ماودي اقعد لوحدي يعني افهموا ولا تركبون تلفريك وتنازلنا عن التلفيرك عشان ست الحبايب ، المهم هذي شوية صور للقمه

وهنا انا صورت قبل اتزلج وكنت وقتها اردى من البزران تعرفون نظام البزران اللي خلاص ذي اخر مره ؟ وتصير مليون اخر مره ! كذا كنت كل شوي تقولي امي خلاص مازهقتي وانا اقولها اخر مره اخر مره

في قارمش وما ناكل ايسكريم ؟ مايصحشش

بعد مانزلنا اخذنا جوله في بحيرة ايبسي ، هذي البحيره لي معها ذكريات تعيسه سنتن من سنين رحناها وكنت ابدل عدسات الكاميرا ذابحني الاحتراف وتطيح العدسه في البحيره :) وبس اهلي قعدوا يهدوني وكذا وحصل خير ومن هالكلام :) لا ابداً ماهزأوني :) ..

الزبده من يبي سمك ؟ :)

وبعد مانتهت الرحله رجعنا لميونخ اذكر وقتها اذا ماخانتني الذاكره كان بررررد ومطر وانا هالاجواء تغويني ماتخليني انام فقلت لنفسي معليش يانورا اسحبيها سهره وبكره ان شاء الله بتقدرين تقومين بدري وانا لا قمت بدري ولا هم يحزنون هو كلام اكذب فيه بنفسي على نفسي عشان اسوي الاشياء اللي مفروض اني ما اسويها وانا مرتاحه :)

اليوم اللي بعده رحنا بحيرة تيجرنسي Tegernsee تبعد عن ميونخ 50 كم

مدري وش وضعها ؟! بس واضح انها مهمومه ومالها خلقي

هنا جالسين نأكل البطه وذي قاطه معهم عاد حزنتني من تالي لأن البط رجوله كبيره ويسبح بسرعه ويسبقها للخبز وهي ياقلبي رجولها نتف مايمدي تسابقهم صرت اعطيها الاكل لوحدها

بعد ماتغدينا رحنا نتمشى في القريه شوي

بعدين مشينا من ميونخ الى بودابست " عاصمة هنغاريا " وكانت اطول رحله من ميونخ مروراً بسالزبورغ - وقفنا في موندسي للإستراحه - بعدين كملنا لفيينا من فيينا الى بودابست , المسافه من ميونخ الى بودابست 684 كم يعني 7 ساعات ونص

هنا صورتين اخذتها واحنا في موندسي للإستراحه

هذا ثاني يوم في بودابست ولأنها اول زياره فَ انطباعي الاول انو حبيتها يعني الواضح انها اقل من باقي دول اوروبا من ناحية السياحه لكن عني حبيت الطابع الاوروبي القديم في المباني كل اللي اقدر اقوله عنها انها تحفه معماريه فخمه ! نهر الدانوب قاسم المدينه لنصين اللي هم بودا و بست وبعدين اتحدوا وصارت مدينه وحده ، المدينه في الليل تتحول لشي ثاني تماماً اول مالدنيا تظلم جسر زيتشيني المعلق  ومبنى البرلمان يصير شكلهم فتتتنه تمنيت لو قدرت اصور بس لأني امر عليهم بالسياره فما يمديني عموماً هذي صوره من قوقل عشان تشوفون جمال المنظر !

هنا الصور من ثالث يوم زرنا فيه مكان ماعرف وش اسمه للأسف :") ! لكن هو زي القلعه في جبل كأنه كان قصر قديم ما اعرف :\ !

هنا الرجال جالس يعلم اخوي كيف يستخدم القوس والسهم وانا اراقبهم عشان اجرب بعده والنتيجه كانت

ماشاء الله علي رميه اسطوريه جبتها في الهدف مباشره ، لا ابداً ما انحشيت بالهنغاري وانا مدري وش السالفه :) كان وراي عائله هنغاريه والواضح انهم ذبوا علي ذبه جامده

واحنا راجعين للفندق شفنا ذا الشي في نهر الدانوب

لاء ذا مب باص غرقان ذا عباره عن باص يمشي في البحر :) !!!! الزبده شكله لفت انتباهي ودي افهم اللي اخترعه وش كان يفكر فيه ؟!!

بعد كذا رجعنا لفيينا والمسافه من بودابست لفيينا قصيره اخذنا ساعتين بس في الطريق
اخر يوم في فيينا اخترنا مكان نطلع فيه كل طاقتنا لأنه اخر يوم ماعاد بنحتاج طاقه ، والوجهه كانت ملاهي براتر Prater
وهي الوجهه المثاليه لكل العائله ، فيها العاب تناسب الاطفال وراح ينبسطون فيها وفيه العاب تناسب الاطفال والكبار عاديه يعني مو خطيره وفي العاب خطيره تناسب اصحاب القلوب القويه اللي انا مو منهم طبعاً D: بس ما اشوفها تتقارن بـ يوروبا بارك في المانيا هذيك اللي جد تطلع كل الطاااقه اللي فيك

ايه بالضبط متعلقين فوق :) اختي واخوي عليهم قوة قلب ختموا كل الالعاب الخطيره تقريباً ذي اللعبه بالنسبه للألعاب الثانيه عندهم لعبة بزران :) بالنهايه كان يوم مممتع طلعنا فيه كل طاقتنا ورجعنا الفندق مافينا حيل نتحرك هههه

وبس بكذا يكون انتهى التقرير عساني انفع اكون مرشده سياحيه ؟ ان شاء الله يكون ممتع ومفيد 3>