Sigma Synthetic Kabuki Brush Kit

السلام عليكم
اليوم البوست راح يكون ريفيو عن مجموعة الكابوكي برش من سيجما وهي مجموعه تحتوي على خمس فرش مصنوعه من الالياف الاصطناعيه تساعدك على وضع المكياج باحترافيه عاليه وبتغطيه مثاليه صُممت لوضع المكياج الكريمي و السائل و البودره جميع الفرش تتميز بأن شعرها كثيف وناعم , تقدرين تطلبينها منفرده او تطلبين المجموعه كامله .

المجموعه اللي كنت ماخذتها فيها 4 فرش شريتهم من الموقع بعدين رجعت شريت الفرشه الخامسه وشريتها قريب اللي هي F88 ومن اللي اعرفه انها اصلاً ماكانت من ضمن المجموعه الاصليه يعني بعدين عملوها فَ هي اضافه جديده , المجموعه برأيي جميله وتفرق بشكل المكياج توزعه بإحتراف وتعطي فينشينغ نظيف , وعلى انها غنيه عن التعريف وكثير كتبوا عنها ونوعاً ما اعتبر متأخره الا انو حبيت اتكلم عن تجربتي واستخدامي لكل فرشه .

Flat Kabuki – F80

هذي حبيبة كل البنات D: اشهر فرشه في سيجما واللي كثير بلوقرز تكلموا عنها .. وكثير بنات يعتبرونها اهم فرشه بهالمجموعه تقريباً اغلب البنات مايسألوا الا عنها من بين فرش هالمجموعه ما اختلف مع اي احد في هالفرشه لأنها من الاشياء القليل اللي فعلاً تستاهل كل هالضجه المعموله عشانها  برأيي ممتازه وتستاهل انو تكون بمجموعة فرش الفاونديشن عند اي بنت .

الشكل : شعرها اصنطاعي كثيف وراسها مسطح متساوي الاطراف .. مررره ناعمه كل فرش سيجما بدون استثناء ناعمين سواء اللي شعرهم اصطناعي او اللي شعرم طبيعي لما امر من عند فرشي على التسريحه لازم امسكهم هههه ايه ناعمين بشكل فضيع واحساسهم على البشره جداً لطيف وحتى بعد الغسيل المتكرر الفرش تحافظ على نعومتها ماتخشن .

طريقة الاستخدام : تُستخدم للمستحضرات السائله والكريميه , وتستخدمينها على الاماكن المسطحه بوجهك " الجبهه , والخدين " , طريقتي في استخدامها استخدمها لتوزيع الاساس السائل او الكريمي بالتنقيط " الستبيلينغ " او بحركه دائريه  .. بالايام اللي تكون فيها بشرتي محتاجه تغطيه اكثر احط الفاونديشن اول بالتنقيط وبعدين ادمج بحركه دائريه , هالفرشه تعطيني تغطيه مثاليه وكامله وبنفس الوقت طبيعيه مايبان الاساس مكتل ولا تعمل خطوط وقد ماتدمجين الفاونديشن ماتلقين ولا شعره من الفرشه على وجهك .. ومع ان سيجما كاتبين انها تُستخدم على الاماكن المسطحه في الوجه لكن ماكنت الاقي اي مُشكله في اني ادمج الفاونديشن في اي مكان بوجهي " تحت العين وحول الانف والفم " .. الفرشه تعطيك تغطيه كامله السبب انو شعرها اصطناعي فما راح تشرب شي من الفاونديشن يعني كل الكميه اللي انتي حاطتها الفرشه راح توزعها على وجهك عكس الفرش الطبيعيه اللي ممكن تعطيك تغطيه خفيفه \ Sheer بسبب انها تشرب من الفاونديشن يعني الشعر ياخذ نص من الفاونديشن والنص الثاني يتوزع على البشره اللي تستخدم فرشه ثنائية الالياف \ duo fiber للفاونديشن راح تلاحظ هذا الشي .. احب بالـF80 انها تختصر الوقت لو كنت مستعجله بس برضو ابي الفاونديشن يكون مضبوط استخدمها , شي ثاني احبه بهالفرشه انها تعطيك نهايه نظيفه يعني كنت الاحظ مع بعض الفرش لما اوزع الفاونديشن الاقي خطوط وكأني محتاجه ارجع على وجهي بفرشه ثانيه عشان انعم الفاونديشن واخليه متساوي بس هالفرشه تعطيك زي ماقلت تغطيه متساويه ونظيفه بالنهايه اشوفها من الـ must have عند اي بنت .

استخدامات اخرى : بصراحه عجزت القى لها استخدامات اخرى D: لأني اشوفها فرشة فاونديشن وبس " على الاقل بالنسبه لي " احياناً استخدمها لدمج الهايلايتر الكريمي .. البعض يقول انها تصلح للبودره بصراحه ما افضلها لهذا الاستخدام مش لأنها سيئه بس لأني استخدمها بشكل شبه يومي مع مستحضرات كريميه فَ لو بستخدمها للبودره لازم اغسلها قبل لا ارجع استخدمها لأي شي كريمي فَ افضل اني استخدمها للفاونديشن بس .

Round Kabuki - F82

الشكل :  حجمها اصغر من الـ F80 وشعرها اكثر واقصر شوي , ومن اسمها اطرافها دائريه .

طريقة الاستخدام : سيجما كاتبين انها تُستخدم للمكياج المعدني \ Mineral makeup سواء فاونديشن بودره او بلاشر , اللي تستخدم مينرال فاونديشن بالايام العاديه بدل الفاونديشن العادي او حتى اللي تستخدم المكياج المعدني بشكل كبير راح تحبها , جربتها مع البودره استخدمتها مع بودرة ماك ستوديو فكس واعطتيني تغطيه متوسطه .. جربتها مع البودره المثبته الحلو فيها انها تلقط الكميه المناسبه من البودره و توزعها بشكل جميل بدون ماتبين الوجه باهت و ماتعطي منظر مكتل او تبرز الجاف , مش فرشتي المفضله للبودره لكن كنت حابه اجربها بأكثر من استخدام و بصراحه هذي اول فرشه من هالمجموعه الى الان مش لاقيه لها هذاك الاستخدام المهم جربتها بأكثر من طريقه اول ماشريتها عشان اعرف بأي استخدام راح احبها كانت تعطيني نتايج حلوه بعدين لقيت نفسي ما استخدمها كثير او حتى ما استخدمها ابداً .

استخدامات اخرى : من الاستخدامات اللي جربتها توزيع البلاشر السايل او الكريمي حجمها صغير ويناسب وجهي ماني من البنات اللي يحبون البلاشر الكريمي او السايل لكن عندي كم واحد وكنت ادمجهم اول بأصبعي ما اقولكم ان هالفرشه ضروريه لهذا الاستخدام لأن لاحظت ان النتيجه هيّا هيّا صراحه مافي اي فرق بس اللي تحب تستخدم الفرشه اكثر من اصابعها في الميك اب هالفرشه ملائمه لهذا الاستخدام .. برضو تقدرين تستخدمينها للبرايمر لو انتي كمان تحبين تعتمدين على الفرش اكثر من اصابعك ساعات استخدمها للبرايمر بس زي ماقلت مو استخدام اساسي لأن اغلب الوقت استخدم اصابعي للبرايمر .. تقدرين تستخدمينها مع  البودره المثبته سواء مضغوطه او حره بالنسبه لي افضل استخدم للبودره المثبته فرشه اكبر ومنفوشه اكثر " فرشة البودره العاديه يعني " واضح اني ماحبيت هالفرشه ؟ ههههه مع ان كثييير يحبونها و يفضلونها على F80 للفاونديشن رأيي انا انو لا ماحبيتها للفاونديشن حجمها صغير وتاخذ وقت اكثر وهي تدمج الفاونديشن بالنهايه اشوفها فرشه زايده عندي بالمجموعه .

Angled Top Kabuki – F84

الشكل : تشبه للـF82 من ناحية ان شعرها كثيف واطرافها دائريه لكن الفرق انها مشطوفه او لها زاويه .

طريقة الاستخدام : تُستخدم للبلاشر والبرونزر الكريمي .. استخدمها للبلاشر الكريمي او السايل توزعهم وتدمجهم بشكل جميل لكن مثل ماقلت مع F82 استخدامي للبلاشر الكريمي او السايل نادر .. ومع انو هالفرشه مشطوفه او لها زاويه وهالشكل مناسب تماماً للبلاشر والبرونزر البودره لكن ابداً ماحبيتها لهذا الاستخدام بالنسبه للبلاشر البودره افضل اني استخدم فرشه انعم وشعرها اقل كثافه حتى توزع لي اللون بشكل طبيعي نفس الكلام مع البرونزر البودره افضل استخدم فرشه ثانيه توزع البرونزر بطريقه انعم بحيث انه مجرد يعطي دفا للوجه .. بس عموماً حبيتها مع البرونزر الكريمي او اي منتج كريمي ابي اعمل فيه كونتور هالفرشه توزعه وتدمجه بشكل جميل مناسبه لو تبين الكونتور يبان طبيعي مره لأنها ماراح تعطيك تحديد حاد او ثقيل بالعكس تدمجه بشكل ناعم وطبيعي .

استخدامات اخرى : كَكل الفرش تقدرين تستخدمينها للفاونديشن , تقدرين تستخدمينها كمان لدمج الاضاءه السايله او الكريميه على عظمة الخد .

Tapered Kabuki – F86

الشكل : مدببه او مغزلية الشكل , تجي عريضه من تحت وراسها دقيق .. شعرها مثل كل الفرش كثيف وناعم .

طريقة الاستخدام : ثاني اكثر فرشه احبها في هالمجموعه استخدمها في دمج الكونسيلر تحت العين السبب انها زي ماشايفين تجي عريضه من تحت وراسها نحيف فبفضل شكلها توصل حتى لزاوية العين استخدمها كمان لدمج الكونسيلر حول الانف او بأي مكان ابيه هو المفروض انها تُستخدم لتوزيع الفاونديشن بالاماكن اللي صعب توصلين لها بالفرشه العاديه مثل تحت العين , حول الانف انا استخدمها بنفس الطريقه بس مع الكونسيلر .. استخدمها برضو في الهايلايت الكريمي تحت العين وعلى الانف بإختصار استخدمها في الهايلايت الكريمي واستخدمها في توزيع البودره تحت العين عشان اثبت الكونسيلر .

استخدامات اخرى : تقدرين تستخدمينها للكونتور الكريمي بالنسبه لي ماحبيتها لهذ الاستخدام يعني افضل F84 اكثر للكونتور لكن اللي تناسبها تقدر تستخدمها طبعاً  .. وتقدرين تستخدمينها كمان في توزيع الهايلايت البودره والكريمي على عظمة الخد .

Flat Angled Kabuki – F88 

الشكل : هالفرشه جمعت F80 و F84 في فرشه وحده .. راسها مسطح مثل F80 ومشطوفه او لها زاويه مثل F84 .

طريقة الاستخدام  تُستخدم للمستحضرات السايله والكريميه ، النتيجه اللي تعطيها بالضبط نفس F80 تغطيه كامله تدمج الفاونديشن بشكل ناعم ومتساوي .. لكن اللي يمزيها الزاويه فَ تسير توزع الفاونديشن تحت العين وحول الانف وحول الفم بطريقة افضل من F80 اللي راسها كله مسطح .. تُستخدم برضو بنفس الطريقه اما بالتنقيط او بحركه دائريه .. هي وF80 كل وحده تكون مكان الثانيه اللي الاقيها نظيفه استخدمها D: .

استخدامات اخرى : تقدرين تستخدمينها للكونتور الكريمي طبعاً مو الجزء المسطح من الفرشه لكن الجزء المشطوف براس الفرشه راح يرسم لك خط الكونتور بشكل مثالي ودقيق وبعدها ترجعين تدمجين بفرشه ثانيه برضو الجزء المشطوف من الفرشه تقدرين تستخدمينه للهايلات الكريمي وللبلاشر الكريمي .

بالنهايه الاستخدامات اللي ذكرتها هي اما الاستخدامات اللي اعتبرها اساسيه في استخدامي للفرش او بعض الاستخدامات اللي جربتها وناسبتني لكن انتي مش مقيده بكلامي تقدرين تجربينها بأي طريقه انتي تحبينها وممكن حتى تكتشفين استخدامات اكثر من اللي ذكرتها 

تجربتي مع الفرش بشكل عام : الفرش كلها توزع مكياجك وتدمجه بطريقه نظيفه واحترافيه بس هل راح تحتاجين الـ 5 فرش ؟ لا طبعاً انا كان ممكن اطلب من هالمجموعه كلها فرشتين بس اللي هم F80 و F86 الاولى للفاونديشن والثانيه للكونسيلر بس وقتها طلبت المجموعه لأني كنت حابه اجرب كل الفرش قد ماكان في ضجه كبيره حول هالمجموعه والكل تكلم عنها فَ كنت حابه اجربها اول , وصح ان شي حلو ان كل الفرش متعددة الاستخدام يعني راح تلقين استخدامات كثير للفرشه الوحده لكن تقريباً الاستخدامات الثانيه للفرش متقاربه جداً لو لاحظتوا كررت نفس الاستخدامات عند معظم الفرش لأنهم بالضبط يعملون بنفس الطريقه ويعطون نفس النتيجه ممكن كمان حجم الفرش ما يناسب الكل يعني بعض البنات راح يشوفونها كبيره على الوجه فما تقدر تعمل فيها كونتور او حتى توزع البلاشر ، لكن غير كذا كل الفرش جودتها ممتازه ولأن مثل ماقلت الفرش كلها شعرها اصطناعي فما تشرب من المستحضرات السايله او الكريميه ، و توزع الفاونديشن بدون ماتعمل خطوط وشعرها مايطيح ابداً لا وانتي تحطين المكياج ولا وانتي تغسلين الفرش وحتى بعد غسلات كثير لحد الحين شعر الفرش مايطيح وشكل الفرش بعد الغسيل والاستخدام مايتغير يعني محافظه على شكلها مافيه شعرات طايره او نافشه " وغالباً هالمشكله ماتلاقينها مع الفرش اللي شعرها اصطناعي عكس الفرش اللي شعرها طبيعي " .

عمر الفرش : تقريباً لهم عندي سنه وكم شهر ماعدا F88 اللي مالها الا كم شهر , الا الان الحمدالله مالاحظت ابداً ان شعر الفرش يطيح واكيد عمر الفرشه يعتمد بشكل كبير عليك انتي .. كيفية تنظيفك لها , وكل كم تنظفينها ووين تحفظينها كل هالاشياء تأثر بعمر الفرشه .

التنظيف : في التنظيف اليومي بمنظف الفرش ماتاخذ دقايق الا وهي ناشفه اما التنظيف العميق اللي بالمويه تاخذ 12 ساعه تقريباً وتنشف تماماً , ونصيحه خليكم حريصين على التنظيف بعد كل استخدام بالذات الفرش اللي تستخدمونها للفاونديشن لأنو لو تركتي التنظيف اليومي وجيتي تنظفينها التنظيف العميق يكون الفاونديشن وصل تحت للشعر الاسود فَ راح تتعبك مره وانتي تنظفينها خصوصاُ انو شعر الفرشه كثيف بتاخذ معك وقت طويل لحد مايطلع كل الفاونديشن وتنظف ويمكن هالشيين يعتبرون عيوب الفرش الوحيده  اللي هي انها تاخذ وقت طويل في التنظيف وتاخذ وقت طويل حتى وتنشف .

السعر : السعر يختلف من مكان لمكان طبعاً , اللي اعرفه ان سيجما ارخص من ماك وتعتبر من الفرش اللي ارخص من ماك ومقاربه جداً لجودتها هذا اذا ماكانت احسن لأن كثير يفضلون سيجما عن ماك لكن برضو ماتعتبر من الفرش الرخيصه مثل ريل تكنيك يعني ! اشوف ان سعرها مقاربه لماك لكن تضل ماك اغلى طبعاً " سيجما كل مالهم يرفعون اسعارهم " .. بالنسبه لي انا ما استخسر في الفرش ولا احاول ادور لها بديل ارخص خاصه البدائل المتوفره في اسواقنا ! لأنها سيئه يعني انا ما ابي اشتري فرشه والقاها بعد كم شهر شعرها يطيح او لما ادمج الفاونديشن القى خطوط او شعر فرشه على وجهي ، في الفرش الجوده مهمه لأن جودة الفرش من جمال مكياجك ولآنها تبقى معك فتره طويله جداً خاصه اذا اهتميتي فيها والاحظ ان البعض يحرص انه ياخذ فرش نفس شكل فرش سيجما بس من ماركات اخرى ارخص مش كل فرشه نفس الشكل راح تعطيك نفس المكياج النظيف والمثالي انا مش من الناس المهووسه بفرش سيجما حالهم حال اي فرش عندهم شي ممتاز وعندهم شي عادي وعندهم شي سيء ! لكن ضد مبدأ انو المهم تاخذين نفس الشكل بالضبط او نفس الديزاين بس بسعر ارخص يعني ابحثي عن الجوده الممتازه بالسعر المعقول بالنهايه هذي فرش حتبقى معك فتره مره طويله .. ولأن الرخيص مو دائماً سيء فَ اللي تبي فرش بسعر معقول وجوده ممتازه خاصه اذا كانت مبتدئه او صغيره وتبي تبدأ تتعلم اشوف ريل تكنيك هي افضل فرش سعرها رخيص وجودتها ممتازه جداً والتاجرات يوفرونها بأسعار مره معقوله سعر مجموعتين من الفرش بسعر فرشتين من ماك او فرشتين من سيجما ! راح اتكلم عن كل فرشهم بالتفصيل في بوست ثاني ان شاء الله .

اماكن توفرها : تقدرين تطلبينها من موقع سيجما اما المجموعه كامله او كل فرشه لوحدها بس راح تطول شوي على ماتوصل او تطلبينها من بعض التاجرات في الانستقرام واكيد تأكدوا انها اصليه .