MY CLARISONIC EXPERIENCE / Mia 2

السلام عليكم
اليوم البوست راح يكون تجربتي مع جهاز تنظيف البشره " الكلاريسونيك " راح اكتب تجربتي بالتفصيل , بالبدايه ماكنت من الناس اللي مره متحمسين يجربونها اول ماهبوا فيها الاجنبيات , كنت متردده مره لكن اختي قد ماشافت الاجنبيات يمدحون فيها كانت مره متحمسه لها فَ لما قررنا نشتري قررنا انو راح نشتري جهاز واحد لانو ماكان في ناس كثير متكلمين عنها ايامها وماحبينا نجازف وكل وحده تاخذ جهاز وبعدين يطلع مش قد المدح ولأن سعرها نوعاً ما يعتبر غالي " وعلى فكره لو عندك اي احد بعائلتك يحب يجرب الجهاز تقدرين تطلبين له فرشه اضافيه يعني اختك الصغيره , امك , اخوك , زوجك .. لأن بالنهايه الفرشه هي اللي راح تنظف بشرتك فَ ماراح يكون في مشكله لو تشاركتوا نفس الجهاز وكل واحد عنده فرشته الخاصه ".. عموماً قبل لا ابدأ بتجربتي راح اتكلم اولاً عن الكلاريسونيك ايش هيا ؟ انواعها ؟ مميزات كل نوع .. سعرها والخ

ايش هيَ الكلاريسونيك ؟ 
جهاز مخصص لتنظيف البشره بعمق وتطهير المسام من الشوائب يعمل بالذبذبات ويعطيك بشره انظف بـ6 مرات في دقيقه واحده فقط .

فوائدها :
- تنظف البشره 6 مرات افضل من اليدين , تشيل ترسبات التلوث بالجو والغبار والمكياج والبكتيريا " مثبت من موقع الكلاريسونيك بالاشعه " .
- البشره بعد استخدامها تستقبل الكريمات والسيروم وتتشربها بشكل افضل .
- تحسين بنعومه في ملمس البشره من اول استخدام .
-  تعمل مساج للبشره فتنشط الدوره الدمويه بالتالي :
1- نظاره ولمعان في البشره .
2- تقلل التجاعيد التعبيريه .
3 - تخفف الاحمرار والتصبغات .
- تساعد على ثبات المكياج واعطائه منظر مختلف .
- تساعد في تقليل المناطق الدهنيه والبقع الجافه .
- لطيفه لتطهير جميع انواع البشره , حتى الامراض الجلديه مثل حب الشباب .
-  تقلل من حجم المسامات .
- لطيفه على البشره مما يجعلها ملائمه للأستخدام مرتين باليوم صباح \ مساء .

هنا صوره لتوضيح الفرق بين التنظيف اليدوي والتنظيف بالكلاريسونيك 

انواعها : 
- اول نوع : ميا \ ميا فرست .
- سرعه واحده .
- للوجه فقط .
- بدون مؤقت تنقل .

- ثاني نوع : ميا 2 .
- سرعتين .
- للوجه فقط .
- فيها مؤقت تنقل .

- ثالث نوع : اريا .
- ثلاث سرعات .
- للوجه فقط .
- فيها مؤقت تنقل .

- رابع نوع : بلس .
- ثلاث سرعات .
- للوجه والجسم .
- فيها مؤقت زمني .

- خامس نوع : برو .
- اربع سرعات .
- للوجه والجسم .
- فيها مؤقت زمني .


مقارنه بين الميا والميا 2 :
بحكم ان السعر والميزات متقاربه راح اعمل مقارنه بسيطه جداً
بالاضافه لأن السرعات في ميا 2 اكثر من ميا .. ميا 2 فيها مؤقت ذاتي بمعنى الجهاز نفسه يحسبلك الثواني على كل جهه من وجهك وبعد ماتخلص المده المحدده عند كل جهه يطلع لك صوت يعلمك انو لازم تنتقلين للجهه اللي بعدها يعني لما تستخدمينها على جبهتك وتنتهي الـ 20 ثانيه بتحسين بإهتزاز بعدها تنتقلين للأنف والذقن وبعد الـ20 ثانيه يرجع الاهتزاز وهكذا بمجرد ماتنتهي الدقيقه الجهاز تلقائياً بيطفي .
ميا 2 حجمها اصغر من ميا واكثر سهوله في حملها عند الاستخدام , وكمان لو تحبين تاخذينها معك وقت السفر حجمها عملي اكثر .


انواع الفرش : 
الفرشه الاساسيه اللي تجي مع الكلاريسونيك هي للبشره الحساسه ,  بس لما تطلبين الجهاز لو حابه فرشه ثانيه معها تحددين بنفسك على حسب احتياجك ونوع بشرتك فتطلبينها " انا ماجربت الا فرشة البشره الحساسه ومرتاحه عليها , الفرشه جداً ناعمه ولطيفه على البشره ومع كذا تنظف من قلب "

اول نوع : للبشره الحساسه جداً او الجافه " ديلكت \ Delicate  "
ثاني نوع : للبشره الحساسه وتناسب جميع انواع البشره " سنستف \ sensitive"
ثالث نوع : للبشره العاديه " نورمل \ Normal  "
رابع نوع : للتنظيف بعمق " ديب بور \ Deep pore " ما انصح فيها يا بنات ابداً هي من اسمها تعمل تنظيف عميق للمسامات لكن الكل ذمها سواء بلوقرز اجنبيات او بنات اعرفهم جربوها , قويه مره على البشره وتسبب حبوب .. في ناس قالوا انها ناسبتهم لكن شخصياً ومن اللي شفته ما انصح فيها .
خامس نوع : للبشره المعرضه لحب الشباب Acne-prone skin " اكني برش \ Acne brush "
سادس نوع : فرشه للجسم \  Body brush . " وهالفرشه تاخذينها لو اشتريتي كلاريسونيك بلس او برو زي ماوضحت بالأنواع "


شرح لكيفية تشغيل الجهاز \ عمل الجهاز : 

قبل الاستخدام :
- تشحنينها لمدة 24 ساعه قبل لا تستخدمينها , بعدها تكون جاهزه للأستخدام وتقعد معك حق 24 دقيقه من الاستخدام " حطي في بالك انها دقيقه وحده في اليوم معناته راح تطول معك " ثم ترجعين تشحنينها 24 ساعه قبل لا تستخدمينها مره ثانيه .. طبعاً انتي مش مقيده بهالكلام لكن يُفضل تشحنينها يوم كامل عشان تطول معك .

الشاحن مغناطيس تركبينه على مقبض اليد لما تبدأ تشحن مؤشر الشاحن بينّور , هو شكله جميل صراحه بس مشكلته  اي حركه ممكن تفصله وتحسبينها تشحن وهي ماتشحن فأنبتهوا دائماً لهذا الشي .

اثناء الاستخدام :
- لو كنتِ حاطه مكياج تزيلين مكياج عيونك بيدك , يعني طريقتك الاعتياديه بإزالة المكياج " قطن + مزيل مكياج " المهم الجهاز ماتستخدمينه على منطقة حول العينين لأن كلنا نعرف انها اكثر منطقه حساسه بالوجه .
- تبللين وجهك + راس الفرشه بمويه دافيه .
- تحطين اي غسول بشره انتي تحبينه " الخيار شخصي " , اما انك تحطينه مباشرةً على الفرشه بكمية قليله جداً او مباشرةً على وجهك
- تشغلين الجهاز وزي ماوضحت بالصوره لو تبين تزودين السرعه تضغطين الزر اللي فوق لأن الجهاز اول مايشتغل راح يشتغل على السرعه الاولى اللي هي الـlaw .
وبس تمررينه على وجهك بحركه دائريه وراح يبدأ يحسب لك عند كل منطقه في وجهك عدد الثواني المطلوبه حتى وتنتقلين للجهه الثانيه .
20 ثانيه للجبهه " وكاتبين بالموقع تبدأين بالجبهه ما احبذ هالشي صراحه افضل ابدأ من تحت من الذقن "
20 ثانيه للأنف والذقن " انتي بنفسك تحسبين عشر ثواني للذقن وعشر ثواني للأنف هو مايبدأ يهز الا بعد ماتنتهي الـ20 ثانيه "
10 ثواني للخد الايمن
10 ثواني للخد الايسر

بعد الاستخدام :
بعد ما تنتهين من التنظيف تستخدمين اي تونر تحبينه عشان تقفلين مساماتك وتبدأين بروتينك اليومي سواءً الصباحي او المسائي .

- يجي معاها عينة جل منظف بحجم 30 مل

هو الغسول جيد صراحه ينظف ولطيف على البشره بس انا مشكلتي معه شغلتين الاولى ان ريحته بالنسبه لي قويه ومزعجه والثانيه والمهمه انه سببلي جفاف حول انفي مع اني استخدم الكلاريسونيك مره وحده باليوم ولا لقيت هالمشكله مع غسولي اللي متعوده عليه من افين ولا حتى لما غيرت افين وجربت سيبيوم جل من بيوديرما ما حصلت لي مشكلة الجفاف , فَ ما ناسبني لكن هالشي يختلف اكيد من بشره للثانيه يعني ممكن غيري تحبه ويعجبها .
وطبعاً تقدرين تستغنين عنه وتستخدمين الغسول اللي انتي مرتاحه عليه .. انا زي ما قلت استخدم غسول من Avene الجل الاخضر مافي غسول في الدنيا يفهم بشرتي غيره D: ومهما اروح واجي على انواع ثانيه ارجعله , بس بالنهايه هذا اختيار شخصي اكيد كل وحده ونوع بشرتها والغسول اللي يناسبها .

ايش الافضل كلاريسونيك او سيجما ؟ 

بعد فتره من استخدامي لكلاريسونيك مع اختي وبعد ما اعجبتني النتايج مره قررت اني استقل بجهاز خاص فيني D: ووصيت على الكلاريسونيك وللأسف جابولي سيجما ولأني جربت الجهازين في نفس الفتره قررت اعمل مقارنه سريعه بينهم للي مترددين بين الاثنين .

السرعه : الكلاريسونيك ميا 2 و سيجما فيهم سرعيتن .
الفرشه : 
- لو ملاحظين الفرق في الصوره شايفين فرشة الكلاريسونيك وفرشة سيجما ؟ الكلاريسونيك الشعرات نفسها اقصر واكثر ومتقاربه , سيجما الشعرات اطول ومتباعده شوي , سيجما حسيت فرشتها اخشن واقسى على البشره من الكلاريسونيك , على الرغم من اني اشوف ان الكلاريسونيك تنظف بشكل اعمق من سيجما لكن تضل لطيفه على البشره .
- سيجما فرشتها تدور بينما الكلاريسونيك تعمل بالذبذبات او الاهتزاز هالتقنيه تنظف بشكل عميق اكثر بكثير من الفرش اللي تدور , وزي ماقلت لطيفه على البشره يعني اللي بشرتها حساسه ممكن تلاقي سيجما خشنه او قاسيه على بشرتها .
- سيجما تجيك مع 3 فرش , الكلاريسونيك فرشه واحده فقط اللي هي الفرشه الاساسيه " للبشره الحساسه " ولو تحبين تطلبين زياده تدفعين طبعاً, الجهازين فرشهم قابله للتغير وسعر فرشة سيجما ارخص من سعر فرشة الكلاريسونيك .
- سيجما متوفر منها سيت كامل فيه 6 فرش للوجه وللجسم كل فرشه لها استخدام " الشي الوحيد اللي اشوفه افضل في سيجما من الكلاريسونيك ان خيارات الفرش في سيجما اكثر يعني عندك مجموعة SPA تجي فيها 3 فرش اضافيه للجسم من ضمنها حجر خفاف للكعب , وفرشة مساج والاخيره ماني فاكرتها صراحه بس تقدرون تشوفونها بموقع سيجما , بينما الكلاريسونيك فرشه وحده للجسم .
الاستخدام : سيجما تُستخدم للوجه والجسم , الكلاريسونيك ميا / ميا 2 / اريا للوجه فقط , بلس وبرو للوجه والجسم .
الشحن : سيجما تشحن بالبطاريه , الكلاريسونيك يجي معاها شاحن " قابله لإعادة الشحن / Rechargeable " وهذا اللي افضله .
المؤقت الذاتي : غير متوفر في سيجما انتي بنفسك تحسبين عدد الثواني على كل جهه من وجهك , الكلاريسونيك كل الانواع فيها مؤقت ذاتي ماعدا اول نوع " ميا او ميا فرست " بس عموما الجهازين يُستخدمون على الوجه لمدة دقيقه وحده فقط .
الالوان : سيجما متوفره بلون واحد فقط , الكلاريسونيك متوفره بألوان عديده .
السعر : سيجما ارخص من الكلاريسونيك بس هل بالنسبه لي تعتبر بديل ارخص ؟ من تجربتي للأثنين لا طبعاً ولا اشوفها بديل عن الكلاريسونيك ونصيحتي ادفعي 200 او 300 زياده بس خذي الافضل .


ايش الشي اللي خلاني اقرر اشتري الكلاريسونيك ؟ :
قبل لا نقرر او بالأصح اختي تقرر كانوا كل الاجنبيات يتكلمون عنها ويمدحونها بشكل يحسسك انو هالجهاز معجزه انا ما اقتنع بالكلام قد ما اقتنع بالنتايج اللي اشوفها قدامي فَ كثير قريت ريفيوز وشفت قبل وبعد حتى اللي بشراتهم مافيها هذيك المشاكل تلقين بشرتها تغيرت ! يعني ساعات تشوفين بنت تقولين ماشاءالله بشرتها صافيه بدون ميك اب وماتحتاج شي بس صدقيني بمجرد ماتستخدم الكلاريسونيك في شي فبشرتها راح يتغير راح يصير فيه لمعان ونضاره وهذا اللي لاحظته على بشرتي ولاحظته علي حتى امي وانا احب الملاحظه من الاهل او الناس اللي يشوفونك بشكل يومي اكثر من غيرهم ليش ؟ لأن هم يشوفونك كل يوم وحافظين شكلك فإذا لفتهم تغيير فيك معناته التغير واضح وكبير .
ولو بحثتي اكثر بالنت عشان تشوفين تجارب اذكر لما كنت ابحث قبل لا اشتريها حتى اللي بشرتها صافيه وتلق بدون ميك اب تحط لك قبل وبعد البشره هيّا هيّا مافيها حبوب مافيها احمرار ولا دارك سبوتس بس قبل الكلاريسونيك تكون البشره باهته ومافيها نضاره وبعد الكلاراسونيك تسير تلمع وهذا اكثر شي يمكن حمسني اجربها
 يعني دورت احد يذم فيها بالمختصر مالقيت D: .

مشكله ممكن تواجهك :
البعض قال سببتلهم بريك اوت انو بداية الاستخدام تبدأ تطلع لك حبوب بشكل غريب ممكن جداً تواجهك هالمشكله , السبب ان الكلاريسونيك تنظف بشرتك من الاعماق فكل الدهون والاوساخ اللي تكون جوى بشرتك وماتقدرين تطلعينها بالتنظيف العادي بيدك الجهاز يطلعها لك , لأنه يتعمق بطبقات الجلد بالبشره ويطلع تراكمات الوسخ والدهون لسطح البشره فالنتيجه تكون حبوب وبعدها تصفى بشرتك وتتحسن , فأقول للي تواجهها هالمشكله لا تخافين بالعكس هذا معناه انو بشرتك ماشيه بالطريق الصحيح وبعدها تنتقلين للمرحله الثانيه  .. اما لو قطعتيها راح ترجع بشرتك لنفس الوضع القديم .. واللي عندها حبوب تحت الجلد ممكن تمر بنفس المشكله  .. وهالشي احياناً يواجهك حتى مع العلاجات اللي يوصفها لك دكتور الجلديه وبعدها تلقين بشرتك تحسنت وتغيرت .


تجربتي :

نوع الجهاز : ميا 2 .

ملحقات الجهاز : شاحن , عينه من غسول للبشره حجمه 30 مل , شنطة سفر / Travel case , كتيب تعليمات .

التغليف : الجهاز مصمم حتى يكون ضد الماء / waterproof تصميمه جميل وعملي ومتين " قوي" ومتوفر بألوان كثير , اخترت اللون الاخضر مع اني من عشاق البنفسجي وكنت متردده بين الاثنين D: بس قلت الاخضر يحسسك بإنتعاش وكذا عموماً يتوفر منه " بنفسجي , ابيض , رمادي , وردي , ازرق , اصفر " وفي موقعهم تلقون كل الالوان وفي الوان جديده نزلت لـ2014 ولو طلبتي جهازك من موقع كلاريسونيك نفسه تقدرين تكتبين اسمك على الجهاز .. يجي داخل شنطة السفر شكلها يكون زي شكل الجهاز عشان تحمي الجهاز , والفرشه عليها غطا , جهازي الاول الوردي كانت شنطة السفر لونها ابيض بس مع الالوان الجديده صاروا يخلون شنطة السفر نفس لون الجهاز , بالنسبه لي احلى .

الشاحن : مغناطيس وضحت بالصوره فوق .. يشتغل على الفولت 110 و 220 .

السرعه : الميا 2 فيها سرعتين وضحت برضو بالصوره فوق
اول ماتشغلينها تلقائياً راح تشتغل على الـ Law  .
الـLaw مناسبه للبشره الحساسه ولجميع البشرات عموماً " اذا حطيتي على الـlaw الجزء السفلي من مؤشر الشاحن راح ينَور "
الـ Normal مناسبه للبشره العاديه سرعتها اعلى بالتالي تعطيك تنظيف اقوى 26% من السرعه الاولى " اذا حطيتي على الـNormal الجزء العلوي من مؤشر الشاحن راح ينًَور "

نوع بشرتي وطبيعة المشاكل فيها : بشرتي دهنيه .. الحمدالله صافيه وماهي تعبانه وماعندي مشاكل كبيره , ماعندي حبوب او اثار لكن مش مضمونه ابداً يعني الا ماتغدر فيني وتطلع لي كم حبه فجأه ويعني مين بشرتها دهنيه وبتكون صافيه على طول P:  ؟! , اعاني من اللمعان الزايد بمنطقة التي زون ما اغسل وجهي الا وبعد ساعتين يقلب زيت قلي بهالمنطقه , مسامات واسعه ورؤوس سودا على الانف وهذا اكثر شي اكرهه لا الـpore stripes يفيدون ! ولا الجيلاتين يشيلهم كلهم والحل الوحيد الفيشل لكن حلول منزليه ولا شي فادني , بالنهايه معاناتي مع بشرتي معاناة اي وحده بشرتها دهنيه يلا اللي يهون علينا اننا مانعجز بدري D:

طريقتي بأستخدام الجهاز في روتين عنايتي اليومي : لو كنت حاطه ميك اب راجعه من مناسبه او من الدوام اول شي اشيل مكياجي , استخدم بيوديرما غالباً لما اكون راجعه من الدوام لأن مكياج عيوني مرره خفيف واحيانا بس ماسكارا .. اما لو راجعه من مناسبه استخدم مزيل مكياج .. البيوديرما ممتاز ولطيف على البشره بس عيبه ماينظف العيون زين .. عموماً مكياج عيونك نظفيه بيدك يعني الجهاز لا يجي لمنطقة حول العين .
بعدها ابلل وجههي عشان يكون رطب قبل لا استخدم الجهاز " بكل الاحوال سواء حاطه ميك اب او مش حاطه اغسلي وجهك قبل لا تستخدمين الجهاز  "

ابلل الفرشه بالمويه بعدها استخدم غسول احطه على الفرشه " تقدرين تحطينه مباشرةً على وجهك بس انا افضل احطه على الفرشه  " وابدأ من الذقن للأنف وبعدين للجبهه واخر شي خدودي

هنا تقدرون تشوفون الميك اب بالفرشه " بمجرد ماتغسيلن الفرشه بالمويه كل الميك اب بيروح "

بعد ما اخلص اغسل وجهي واحط تونر عشان اقفل المسام وابدأ بروتين عنايتي الليلي وجد بعد استخدامي للكلاريسونيك بديت احس ان كل شي احطه على وجهي ان كان كريم او سيروم فبشرتي جالسه فعلاً تستفيد منه .

النتائج : نجي للنتايج الان .. النعومه لاحظتها من اول استخدام وتجلس بشرتك ناعمه حتى اليوم الثاني , قلت مشكلة اللمعان والتدهين ما اختفت الا الان بشرتي دهنيه لكن معاناتي نوعا ما قلت .. النضاره واللمعان الحمدالله لقيتهم وراح تلاحظينهم من اول اسبوع وبتلاحظين ان وجهك منور , من اول استخدام حسيت ان بشرتي لأول مره تتنفس هههه  .
الامور الاخرى مثل الاحمرار ممكن يخف بعد اسبوع بس مايختفي تماماً الحبوب لا تزال تطلع صراحه بس انا من الاساس بشرتي صافيه مو انو فيها حبوب وابيها تروح لا تطلع لي حبوب من فتره لفتره ولا تزال تطلع .. الرؤوس السودا اختفت تماماً المسامات صارت اصغر , واحب اذكر شغلتين الاولى عن الرؤوس السودا وعن بشرتك بشكل عام استخدامي للجهاز بشكل يومي هو اللي اعطاني نتيجه فعّاله مع الرؤوس السودا اغنتني عن الجيلاتين وعن اي حوسه ثانيه بس بمجرد ما اقطعه راح ترجع المشكله يعني اي وحده تتوقع هالشي لو قطعتي استخدام الجهاز ممكن جداً مشكلة بشرتك القديمه ترجع مره ثانيه وبنفسك راح تلاحظين كيف لما ترجعين تستخدمينه ترجع بشرتك تتحسن لا تخافون من هالناحيه ان بشرتك تسير اسوء او ماشابه لا مجرد ان المشكله ترجع تظهر مره ثانيه شي ثاني المسامات والبقع او اثار الحبوب كل هالأمور هي اكثر شي راح يطول معك لين تبان نتيجته فَ لا يجيك احباط لو استخدمتيها شهر او شهرين ومالقيتي تغيير يُذكر اعطيها شوية وقت وراح تبهرك النتايج انا متأكده .. وما اقول ان بشرتي صارت محصنه ضد المشاكل D: لكن وبكل امانه صرت راضيه عن بشرتي اكثر بكثير , شكل وملمس بشرتي صار انعم بعد استخدامي لها وهالشي يخلي مكياجك يكون احلى وواثقه 100% ان اي بنت راح تلاحظ الفرق بمكياجها .. اكثر شي حبيته اني من بعد الكلاريسونيك حسيت ان بشرتي جالسه تستفيد وتتجاوب مع الكريمات بشكل اسرع وافضل من اول وهالشي راح يساعد بشكل كبير في ان بشرتك تتحسن يعني سواء جالسه تستخدمين كريم مرطب , او كريم معالج للحبوب او اي كريم او سيروم لأي غرض انتي تبينه راح تلاقين نتيجة هالمنتج بشكل اسرع لأن بشرتك جالسه تمتصه بشكل افضل .. يعني وجهة نظر شخصيه برضو ما اشوف ان الجهاز راح يوحد بشرتك او راح يقضي على كل المشاكل فيها قد ما انه راح ينظفها من الزيوت والتراكمات والاوساخ العالقه بالمسامات وهذي المشكله اللي كلنا نعاني منها حتى لو البعض منا مايدري , وبالنهايه كريماتك وانتي ايش تستخدمين حق بشرتك هي المسؤوله اكثر بس الكلاريسونيك راح تساعد بنسبه كبيره ان بشرتك تتجاوب بشكل اسرع مع اي كريم يعني لا تتوقعين انه لو اعتمدتي بس على الكلاريسونيك ونظفتي بشرتك وخلاص وقفتي عند هالحد راح تلقين بشرتك نظيفه وصافيه , لا الخطوه الاولى تنظفينها والخطوه الثانيه تهتمين فيها وهنا كل وحده وطريقتها وزي ماقلت الكريمات اللي تستخدمها واللي تخدم احتياجها .

الميك اب .. انا كنت مخدوعه يا بنات والله كلنا كنا مخدوعين ههههههه اللي مثلي كانت بعد ماترجع من المناسبه تنظف وجهها بمزيل ميك اب وقطن وتغسل وجهها وتدهر بالكريمات ثم تنام وهي مطمنه وضميرها مرتاح انها سوت اللي عليها احب اقولها انتي كنتي مخدوعه طول هالسنين D: اللي نسويه مايشيل ربع الميك اب اللي بالوجه الكلاريسونيك راح تطلع لك بلاوي من وجهك وعشان تتأكدين اكثر نظفي وجهك بأي مزيل ميك اب واغسليه واستخدمي الكلاريسونيك راح تجيك صدمه عاطفيه لما تشوفين انو لسه في ميك اب في وجهك حتى بعد مانظفتيه ! انا وقتها جلست اقول اذا انا ما انام الا وشايله الميك اب اجل اللي تنام فيه وتشيله الصباح كيف ؟ على بشرتها السلام اجل D: بس فعلاً بعد ما استخدمتها وش الاحساس اللي صار يجيني لما ارجع من مناسبه واشيل المكياج تعرفون الاحساس اللي تكونين لابسه كعب طول المناسبه واول ماترجعين البيت تفصخينه شفتوا شعور الراحه ؟ بالضبط صرت احس فيه مع الميك اب ههههه

الاستخدام اليومي : في بنات قالوا يحسونها راح تكون قويه على البشره لو استخدموها مرتين باليوم وانا اايد هالكلام من جهه واعارضه من جهه اخرى D: ! لأني جربت الاستخدام مرتين باليوم لفتره ومالاحظت اي مشاكل .. بس الحين صرت استخدمها في روتين عنايتي المسائي بس لأني ما اشوف اني محتاجتها الصباح  .. فأنتي تحددين احتياجك لها لو تشوفين انو بشرتك عادي ممكن تتحمل تستخدمينها مرتين باليوم او لو تشوفين ان بشرتك حساسه مره وماتتحمل استخدميها مره وحده والبعض يقولك استخدمها مرتين بالأسبوع وبنات يقولون يستخدمونها بس اذا كانوا حاطين ميك اب .. والبعض يقول تجفف البشره اذا استخدمتها بشكل يومي يعني كل وحده تحدد احتياجها انتي ادرى بنوع بشرتك وانتي تحددين استخدامك للجهاز , بس وجهة نظري الشخصيه جداً D: اشوف ان مره باليوم كفايه .

التنظيف : كاتبين بالموقع لا تستخدمي مساحيق التنظيف أو المواد الكيميائيّة لتنظيف أي قسم من أقسام الفرشاه , ولا تضعي أي قسم من الفرشاة في غسالة الصحون .

المقبض \ Handle : تنظفينه مره وحده بالأسبوع , تشيلين راس الفرشه وتغسلين المقبض بمويه دافيه وصابون بهدف ازالة اي بقايا متراكمه عليه , المقبض مصمم حتى يكون ضد المويه فَ لا تحاولين ابداً انك تفتحينه .

رأس الفرشاة \ Brush head : تنظفينها مره وحده في الاسبوع تفصلينها عن المقبض وتغسلينها بمويه دافيه وصابون وعشان تجففينها تفركينها بمنشفه مدة 5 لـ 10 ثواني اثناء ما الجهاز يشتغل , او تركبين فرشه ثانيه وتخلين الاولى تنشف من نفسها .

ويُفضل تغيرين الفرشه كل 3 شهور تماماً مثل فرشة الاسنان هما كاتبين كل 3 شهور بس انا غيرت فرشتي بعد 6 شهور السبب اني ماكنت عارفه من فين اجيب فرشه ثانيه لكن ما انصح اي وحده تعمل مثلي يعني بالكثير 4 شهور وغيروها , لما طلبت جهاز خاص فيني طلبت معاه فرش لي ولأختي عشان نغير فرشنا القديمه

هالعلبه كان عليها عرض بـ 270 ريال ويكون فيها 4 فرش انصح فيها اريح لك من انك كل 3 شهور تطلبين فرشه والحلو فيها شايفين وش مكتوب ؟ محطوط لك الشهور ومكتوب " Remind me \ ذكرني " يعني تأشرين على الشهر اللي استخدمتي فيه الفرشه عشان تعرفين بالضبط متى تنتهي الـ3 شهور وتبدلينها بفرشه ثانيه , وبتلاحظين بنفسك متى الفرشه تحتاج تغير راح تشوفين لونها يتغير وشعر الفرشه ينفش شوي وماتصير ناعمه ومفعولها بالتنظيف يقل عشان كذا يُفضل تغيرينها كل 3 شهور وهذا عيبها الوحيد لأن الفرش سعرها غالي .



تنبيهات مهمه :
1- لو كنتي تخضعين لكورس علاجي لبشرتك استشيري دكتورتك قبل لا تستخدمين الكلاريسونيك .
2- لا تستخدمين فرشتك الخاصه مع اي شخص ثاني لو حابه تتشاركين الجهاز مع اي شخص اطلبي فرشه اضافيه بحيث تتشاركون الجهاز فقط وكل واحد يكون عنده فرشته الخاصه .
3- اثناء استخدام الكلاريسونيك لا تضغطين بقوه عليها وانتي تنظفين بشرتك لأن هي جالسه تنظف مجرد انك مرريها على وجهك بحركه دائريه بدون ضغط .
4- لا يُنصح بإستخدام اي مقشر للبشره مع الكلاريسونيك لأن التقشير مع حركة الجهاز اللي اساساً تعمل تقشير راح يكون قاسي على بشرتك استخدمي غسول ناعم وابتعدي عن منتجات التقشير اللي تكون فيها حبوب صغيره .

- السعر : الميا 2 سعرها 560 ريال انا شريتها من سيفورا امريكا , تختلف الاسعار على حسب المكان اللي بتطلبين منه لو بتاخذينها مباشرة من سيفورا او لو بتطلبينها من موقعهم او من امازون وطبعاً لو بتطلبينها من تاجره السعر بيكون اغلى شويتن تقريباً 800 وحولها ومع الشحن بتطلع لك اكثر ممكن توصل لـ1000 .. وتختلف على حسب الانواع عندك ميا وميا 2 ارخص مثلاً من الاريا والبلس وبرو  .

هل تستاهل التجربه ؟ : نعم وبقوه , يمكن البعض يقول ماحسيت بفرق خيالي في بشرتي ! بس انا اقول يكفي النظافه اللي تعطيها بشرتك واللي مستحيل تحصلينها من تنظيف الوجه باليدين بس .. ويكفي انها تنظف وجهك من المكياج من الاعماااق وهالشي مستحيل برضو تحصيلنه بمزيل مكياج وقطن ! .. يمكن ماراح تعالج لك مشاكل بشرتك من حبوب ورؤوس سودا وتصبغات في يوم وليله يعني ولا وحده تتوقع انه من اول استخدام كل مشاكل بشرتها راح تنحل , لكن متأكده ان مع اول استخدامات بتشوفين النضاره واللمعان والبشره الناعمه والمنوره وبتسير روتين ولا بتستغنين عنها , ومشاكل البشره عموماً ماتنحل بأسبوع ولا بشهر حتى , فأستمري عليها وانتي بنفسك بتلاحظين كيف بشرتك بتتحسن , واللي بتقول غاليه فأنا اشوف ان سعرها جداً معقول على جهاز تستخدمينه بشكل يومي وبيعيش معك فتره طويله .. من الاخر انتي تحتاجين هالشي في حياتك صدقيني D: .

اماكن توفرها :
متوفره في سيفورا  " مو موجوده في فروع سيفورا السعوديه والبحرين " لكن موجوده في فروع الامارات وقطر والكويت
الامارات دبي - دبي مول  ومول الامارات , والكويت في الافنيوز , تقدرون تشترونها مباشرةً من المحل , او تطلبونها من موقع سيفورا .
او تطلبونها من موقع الكلاريسونيك .
او من امازون .
او من بعض التاجرات في الانستقرام ولو اني ما انصح لأن بعض اللي اعرفهم تفاجئوا ان اجهزتهم مو اصليه حرام تدفعين مبلغ وقدره على جهاز مش اصلي واللي يقهر اكثر ان سعر الجهاز الاصلي لو طالبته من الموقع بيطلع لك ارخص , عموماً تأكدي ان التاجره ثقه وتأكدي ان الجهاز اصلي " راح اشرح كيف تتأكدين ان جهازك اصلي "

شايفين الكود ؟ هالرمز او الكود مهم في حاجتين :
- عشان تفعلين الضمان " مدته سنتين " .
- عشان تتأكدين ان جهازك اصلي " في حال طلبتيه من تاجره او من اي موقع "
كل اللي عليك تدخلين موقع الكلاريسونيك  http://www.clarisonic.com  تنزلين لأخر الصفحه بتلقين مكتوب كلام اضغطي على الجمله اللي انا حاطه عليها مربع " Register Your Clarisonic "

بتنتقلين لهذي الصفحه .. عبي البيانات ومن ضمن البيانات بتلقين lot code اللي حاطه عليها مربع اسود .. هنا تحطين الكود اللي موجود على جهازك .

اخر شي اضغطي Register Your Product لو جهازك اصلي الكود راح يكون صحيح وراح يسجلك لو مش اصلي ماراح يسجلك وبيطلع لك Lot code is invalid!

لو مش حابه الميا 2 وتبين تجربين الانواع الثانيه بس تبين تقرأين عنها اكثر .. انصحك تقرأينها من موقعهم  بتلقين هناك مميزات كل نوع وطريقة الاستخدام وكل المعلومات اللي تحتاجينها .
شخصياً انصح بالميا 2 لأنها افضل من الميا من حيث الحجم والمؤقت الذاتي وكمان مافي فرق كبير بينها وبين الاريا
بس لو انتي حابه تستخدمين الجهاز لوجهك وجسمك فتقدرين تقرأين مميزات البلس والبرو .

وبكذا اكون انتهيت اتمنى اني ما اكون نسيت ولا نقطه ويكون البوست شامل .